As rendas atribuídas declararanse na epígrafe "Réximes especiais: Réxime de atribución de rendas" (EPÍGRAFE F da páxina 8 da declaración).
Cálculo das rendas atribuídas
Para o cálculo das rendas que hai que lle atribuír a cada un dos socios, herdeiros, comuneiros ou partícipes, aplicaranse as seguintes regras:
1. As rendas obtidas no período impositivo deberán ser determinadas pola entidade de acordo coas normas do IRPF. Non obstante, cando todos os membros da entidade en réxime de atribución de rendas sexan suxeitos pasivos do imposto de sociedades ou contribuíntes do imposto sobre a renda de non residentes con establecemento permanente, a renda atribuíble determinarase de acordo coas normas do imposto sobre sociedades.
2. Non serán aplicables, por parte da entidade, ao calcular a renda obtida, as seguintes reducións sobre o rendemento neto previstas no IRPF:
- Redución do 50 % ou do 100 % sobre os rendementos netos de capital inmobiliario nos supostos de arrendamento de vivendas (art.23.2 da lei).
- Redución do 40 % sobre os rendementos netos do capital inmobiliario, mobiliario ou de actividades económicas, con período de xeración superior a dous anos ou obtidos de forma notoriamente irregular no tempo (arts. 23.3, 26.2, e 32 da lei).
IMPORTANTE: estas reducións, que non poden ser aplicadas pola entidade para o cálculo das rendas obtidas, si poderán ser practicadas por aqueles membros que sexan persoas físicas contribuíntes polo IRPF, consignándoas nos recadros correspondentes da declaración (recadros 186, 192 e 195).
3. A parte de renda atribuíble a socios, herdeiros, comuneiros ou partícipes, contribuíntes por este imposto, que formen parte dunha entidade en réxime de atribución de rendas constituída no estranxeiro, determinarase de acordo coas regras anteriores.
4. Cando a entidade obteña rendas de fonte estranxeira que procedan dun país co que España non teña subscrito un convenio para evitar a dobre imposición con cláusula de intercambio de información, as rendas negativas computaranse na medida en que non excedan do importe das rendas positivas obtidas no mesmo país ou territorio e procedan da mesma fonte. O exceso de rendas negativas computarase nos catro anos seguintes, na medida en que a entidade obteña rendas positivas no mesmo país ou territorio e procedan da mesma fonte.
5. As rendas atribuiránselles aos socios, herdeiros, comuneiros ou partícipes, segundo as normas ou pactos aplicables en cada caso e, se estes non lle constasen á Administración tributaria en forma fidedigna, atribuiranse por partes iguais.
Retencións e pagamentos á conta soportados pola entidade
As rendas que se aboen a entidades en atribución estarán suxeitas a retención ou ingreso á conta, de acordo coas normas deste imposto, con independencia de que todos ou algún dos seus membros sexa contribuínte polo IRPF, suxeito pasivo do imposto sobre sociedades ou contribuínte polo imposto sobre a renda de non residentes. As ditas retencións ou ingresos á conta deduciranse na declaración de cada un dos membros, na mesma proporción en que se atribúan as rendas.