Coa axuda dunha ventá de selección, deberá indicarse a actividade que se desenvolve.
Considéranse actividades independentes cada unha das que figuran relacionadas por separado na ventá de selección:
1- AGRÍCOLA OU GANDEIRA, SUSCEPTIBLE DE ESTAR INCLUÍDA NO RÉXIME ESPECIAL DA AGRICULTURA, GANDERÍA E PESCA DO IVE
En estimación obxectiva constitúe unha soa actividade o conxunto das explotacións agrícolas e gandeiras desenvolvidas polo mesmo titular que sexan susceptibles de estar incluídas no réxime especial de agricultura, gandería e pesca do imposto sobre o valor engadido.
Así mesmo, esta actividade comprende os traballos e servizos accesorios de natureza agrícola ou gandeira, prestados polos titulares das explotacións cos medios ordinariamente utilizados nestas, sempre que sexan susceptibles de estar incluídos no citado réxime especial do IVE (é dicir, cando o seu importe non superase no ano anterior o 20 por 100 do volume total de operacións).
2- ACTIVIDADE FORESTAL SUSCEPTIBLE DE ESTAR INCLUÍDA NO RÉXIME ESPECIAL DA AGRICULTURA, GANDERÍA E PESCA DO IVE
Constitúe unha actividade independente o conxunto das explotacións forestais desenvolvidas polo mesmo titular, que sexan susceptibles de estar incluídas no réxime especial de agricultura, gandería e pesca do imposto sobre o valor engadido.
Así mesmo, esta actividade comprende os traballos e servizos accesorios prestados polos titulares das explotacións cos medios ordinariamente utilizados nestas, sempre que sexan susceptibles de estar incluídos no citado réxime especial do IVE (é dicir, cando o seu importe non superase no ano anterior o 20 por 100 do volume total de operacións).
3- GANDERÍA INDEPENDENTE
A actividade de gandería independente comprende as explotacións gandeiras incluídas na división 0 das tarifas do IAE, cuxa definición se recolle na regra terceira da Instrución para a aplicación do imposto sobre actividades económicas á actividade de gandería independente (Real decreto lexislativo 1259/1991, do 2 de agosto).
4- SERVIZOS DE CRÍA, GARDA E ENGORDA DE GANDO
Terán a consideración de actividade independente os servizos de cría, garda e engorda de gando prestados a terceiros, cando non sexan susceptibles de estar incluídos, como servizos accesorios dunha explotación gandeira, no réxime especial de agricultura, gandería e pesca.
5- OUTROS TRABALLOS, SERVIZOS E ACTIVIDADES ACCESORIOS PRESTADOS POR AGRICULTORES E GANDEIROS QUE ESTEAN EXCLUÍDOS OU NON INCLUÍDOS NO RÉXIME ESPECIAL DA AGRICULTURA, GANDERÍA E PESCA DO IVE
Constitúe unha actividade independente a prestación, por agricultores e gandeiros, de traballos ou servizos accesorios de natureza agrícola ou gandeira, cos medios que ordinariamente son utilizados nas súas explotacións, cando as ditas operacións estean excluídas da aplicación do réxime especial da agricultura, gandería e pesca do imposto sobre o valor engadido.
Tamén se inclúen neste parágrafo outras actividades accesorias realizadas por agricultores ou gandeiros, non incluídas no dito réxime especial do IVE, tales como agroturismo, artesanía, caza, pesca e actividades recreativas e de ocio nas que o agricultor ou gandeiro participe como monitor, guía ou experto (excursionismo, sendeirismo, rutas ecolóxicas etc.).
Estes traballos, servizos e actividades accesorios só están incluídos no réxime de estimación obxectiva cando o seu volume de ingresos (conxuntamente co dos traballos, servizos e actividades accesorios que se describen no parágrafo seguinte) resulte inferior ao correspondente ás actividades agrícolas e gandeiras ou forestais principais.
No suposto de que se supere este límite, os traballos, servizos e actividades accesorios indicados constituirán unha actividade independente non incluída no réxime de estimación obxectiva.
Se os traballos ou servizos accesorios están incluídos no réxime especial de agricultura, gandería e pesca do IVE, non terán a consideración de actividade independente, senón que o seu rendemento se determinará xunto co da actividade principal, como se indica no parágrafo correspondente á clave 1.
6- OUTROS TRABALLOS, SERVIZOS E ACTIVIDADES ACCESORIOS PRESTADOS POR TITULARES DE ACTIVIDADES FORESTAIS QUE ESTEAN EXCLUÍDOS OU NON INCLUÍDOS NO RÉXIME ESPECIAL DA AGRICULTURA, GANDERÍA E PESCA DO IVE
Constitúe unha actividade independente a prestación, por titulares de explotacións forestais, de traballos ou servizos accesorios, cos medios que ordinariamente son utilizados nas súas explotacións, cando as ditas operacións estean excluídas da aplicación do réxime especial da agricultura, gandería e pesca do imposto sobre o valor engadido.
Tamén se inclúen neste parágrafo outras actividades accesorias realizadas por titulares de explotacións forestais, non incluídas no dito réxime especial do IVE, tales como agroturismo, artesanía, caza, pesca e actividades recreativas e de ocio nas que o titular da actividade forestal participe como monitor, guía ou experto (excursionismo, sendeirismo, rutas ecolóxicas etc.).
Estes traballos, servizos e actividades accesorios só están incluídos no réxime de estimación obxectiva cando o seu volume de ingresos (conxuntamente co dos traballos, servizos e actividades accesorios que se describen no parágrafo anterior) resulte inferior ao correspondente ás actividades agrícolas, gandeiras e forestais principais.
No suposto de que se supere este límite, os traballos, servizos e actividades accesorios indicados constituirán unha actividade independente non incluída no réxime de estimación obxectiva.
Se os traballos ou servizos accesorios están incluídos no réxime especial de agricultura, gandería e pesca do IVE, non terán a consideración de actividade independente, senón que o seu rendemento se determinará xunto co da actividade principal, como se indica no parágrafo correspondente á clave 2.
7- APROVEITAMENTOS QUE CORRESPONDAN AO CEDENTE NAS ACTIVIDADES AGRÍCOLAS DESENVOLVIDAS EN RÉXIME DE PARCERÍA
Constitúen unha actividade independente os aproveitamentos que correspondan ao cedente en actividades agrícolas desenvolvidas en réxime de parcería, cando supoñan o exercicio dunha actividade empresarial por participar na ordenación por conta propia dos medios de produción e recursos humanos, coa finalidade de intervir na produción ou distribución de bens ou servizos (art. 27 da lei)
En caso contrario, os rendementos obtidos polo cedente consideraranse fiscalmente procedentes do capital inmobiliario.
8- APROVEITAMENTOS QUE CORRESPONDAN AO CEDENTE NAS ACTIVIDADES FORESTAIS DESENVOLVIDAS EN RÉXIME DE PARCERÍA
Constitúen unha actividade independente os aproveitamentos que correspondan ao cedente en actividades forestais desenvolvidas en réxime de parcería cando supoñan o exercicio dunha actividade empresarial por participar na ordenación por conta propia dos medios de produción e recursos humanos, coa finalidade de intervir na produción ou distribución de bens ou servizos.
En caso contrario, os rendementos obtidos polo cedente consideraranse fiscalmente procedentes do capital inmobiliario.
9- PROCESOS DE TRANSFORMACIÓN, ELABORACIÓN OU MANUFACTURA DE PRODUTOS NATURAIS
Inclúense no réxime de estimación obxectiva, como actividade independente, os procesos de transformación, elaboración ou manufactura de produtos naturais, vexetais ou animais que requiran a alta nunha epígrafe correspondente a actividades industriais nas tarifas do imposto sobre actividades económicas e sexan realizados polos titulares das explotacións das cales se obteñan directamente os ditos produtos naturais.
Se os procesos de transformación, elaboración ou manufactura se realizan, total ou parcialmente, con produtos adquiridos a terceiros, a actividade non estará incluída no réxime de estimación obxectiva.
Nota: se se exerce a actividade a través dunha entidade en réxime de atribución de rendas como son as entidades sen personalidade xurídica (comunidades de bens, herdanzas xacentes etc.) ou as sociedades civís, teñan ou non personalidade xurídica, non debe cubrir este parágrafo. Deberá consignar o rendemento neto atribuído na epígrafe F "Réximes especiais" (páxina 8 da declaración).