A base impoñible do aforro está constituída polos seguintes compoñentes:
A) SALDO POSITIVO DE RENDEMENTOS DO CAPITAL MOBILIARIO DERIVADOS DE (art. 25.1, 2 e 3):
- Participación nos fondos propios de entidades
- Cesión a terceiros de capitais propios (salvo que procedan de entidades vinculadas co contribuínte)
- Operacións de capitalización
- Contratos de seguro de vida ou invalidez
- Rendas que teñan por causa a imposición de capitais
Se o resultado da integración e compensación reflectise saldo negativo, o seu importe só se poderá compensar co positivo que se poña de manifesto durante os catro anos seguintes, diferenciando os valores negativos de débeda subordinada e de participacións preferentes dos do resto de rendementos.
B) SALDO POSITIVO DE GANANCIAS E PERDAS PATRIMONIAIS DERIVADAS DA TRANSMISIÓN DE ELEMENTOS PATRIMONIAIS
Inclúese neste grupo o saldo positivo das ganancias e perdas patrimoniais que se poñan de manifesto con ocasión de transmisións de elementos patrimoniais ou de melloras realizadas nestes, sempre e cando entre as datas de adquisición e transmisión transcurrese máis dun ano.
.
Estas ganancias e perdas intégranse e compénsanse exclusivamente entre si en cada período impositivo. Se o resultado da compensación é positivo, o saldo intégrase na base impoñible do aforro. Non obstante, se o resultado da compensación reflicte saldo negativo, o seu importe só se poderá compensar co saldo positivo das ganancias e perdas patrimoniais que, correspondentes a esta mesma epígrafe, se poñan de manifesto durante os catro anos seguintes, diferenciando as ganancias e perdas patrimoniais derivadas de débeda subordinada e de participacións preferentes das do resto.
A compensación deberá efectuarse na contía máxima que permita cada un dos exercicios seguintes e sen que se poida practicar fóra do prazo a que se refire o parágrafo anterior mediante a acumulación a perdas patrimoniais de exercicios posteriores.