Das achegas que non sexan en diñeiro a sociedades, a ganancia ou perda determinarase pola diferenza entre o valor de adquisición dos bens ou dereitos achegados e a cantidade maior das seguintes:
- O valor nominal das accións ou participacións sociais recibidas pola achega ou, se é o caso, a parte correspondente deste. A este valor engadiráselle o importe das primas de emisión.
- O valor de cotización dos títulos recibidos no día en que se formalice a achega ou o inmediato anterior.
- O valor de mercado do ben ou dereito achegado.
O valor de transmisión así calculado terase en conta para determinar o valor de adquisición dos títulos recibidos como consecuencia da achega non pecuniaria.
RÉXIME ESPECIAL DAS ACHEGAS DE RAMAS DA ACTIVIDADE E DE ELEMENTOS PATRIMONIAIS AFECTOS A ACTIVIDADES ECONÓMICAS (art. 37.3 da lei)
O réxime especial de achegas de ramas de actividade e de achegas de elementos patrimoniais afectos a actividades empresariais a cambio de valores representativos do capital social dunha entidade, regulado nos artigos 83 e seguintes do texto refundido da Lei do imposto sobre sociedades, poderá aplicarse ás persoas físicas que a continuación se relacionan sempre que, unha vez realizadas as achegas, participen nos fondos propios da entidade que recibe a achega en, polo menos, o 5 por 100.
• Achegas de ramas de actividade.
• Achegas de elementos afectos a actividades económicas.
En ambos os casos, é preciso que o contribuínte leve a contabilidade da súa actividade económica de acordo co disposto no Código de comercio.
• Achegas de accións ou participacións sociais en entidades residentes en territorio español ás que non resulte aplicable o réxime especial de agrupacións de interese económico, españolas ou europeas, e de unións temporais de empresas, nin teñan como actividade principal a xestión dun patrimonio mobiliario ou inmobiliario nos termos previstos no artigo 4.oito.dous da Lei 19/1991, do 6 de xuño, do imposto sobre o patrimonio.
As accións ou participacións achegadas deben representar unha participación de polo menos un 5 por 100 dos fondos propios da entidade e estar en posesión do achegante de maneira ininterrompida durante o ano anterior á data do documento público no que se formalice a achega.
Cando sexa aplicable este réxime especial, non se integrarán na base impoñible as rendas que se poñan de manifesto como consecuencia das transmisións realizadas.
Pola súa parte, as accións ou participacións recibidas a cambio das achegas de ramas de actividade ou de elementos afectos a actividades empresariais, valoraranse, para os efectos fiscais, polo valor contable dos elementos transmitidos e tomando como antigüidade destas a data de adquisición do elemento achegado. Os elementos patrimoniais achegados non poderán ser valorados, para os efectos fiscais, por un valor superior ao seu valor normal de mercado.