Cando a alteración no valor do patrimonio proceda da transmisión a título oneroso de valores admitidos a negociación nalgún dos mercados secundarios oficiais de valores definidos na Directiva 2004/39/CE do Parlamento Europeo e do Consello, do 21 de abril de 2004, relativa aos mercados de instrumentos financeiros, e representativos da participación en fondos propios de sociedades ou entidades, a ganancia ou perda computarase pola diferenza entre o seu valor de adquisición e o valor de transmisión, determinado pola súa cotización nos ditos mercados na data en que se produza aquela ou polo prezo pactado cando sexa superior á cotización.
Cando existan valores homoxéneos considerarase que os transmitidos polo contribuínte son aqueles que adquiriu en primeiro lugar (art. 37.2 da lei).
DEREITOS DE SUBSCRICIÓN
Para a determinación do valor de adquisición deducirase o importe obtido pola transmisión dos dereitos de subscrición.
Non obstante, se o importe obtido na transmisión dos dereitos de subscrición chegase a ser superior ao valor de adquisición dos valores dos cales procedan tales dereitos, a diferenza terá a consideración de ganancia patrimonial para o transmisor, no período impositivo en que se produza a transmisión, considerando como período de permanencia dos dereitos o que corresponda aos valores dos cales procedan.
Cando non se transmita a totalidade dos dereitos de subscrición, entenderase que os transmitidos corresponden aos valores adquiridos en primeiro lugar (art. 37.2 da lei).
ACCIÓNS LIBERADAS
1- Accións totalmente liberadas
Cando se trate de accións totalmente liberadas, o valor de adquisición tanto destas como das que procedan resultará de repartir o custo total entre o número de títulos, tanto os antigos como os liberados que correspondan; e considerarase como antigüidade destas a que corresponda ás accións das cales procedan (art. 37.2 da lei).
2- Accións parcialmente liberadas
Cando se trate de accións parcialmente liberadas, o seu valor de adquisición será o importe realmente satisfeito polo contribuínte e a súa antigüidade será a que corresponda segundo a data da entrega.
DISTRIBUCIÓN DA PRIMA DE EMISIÓN E REDUCIÓN DE CAPITAL CON DEVOLUCIÓN DE ACHEGAS
No caso de distribución da prima de emisión de accións ou participacións, ou de redución de capital que teña por finalidade a devolución de achegas (art. 33.3.a) da lei), o importe obtido minorará, ata a súa anulación, o valor de adquisición das accións ou participacións afectadas e o exceso que, se é o caso, resulte tributará como rendemento de capital mobiliario. Se a redución de capital procede de beneficios non distribuídos, a totalidade das cantidades percibidas por este concepto tributará de acordo co previsto na alínea 1 do artigo 25.1.a) da lei.