Un modelo: I Encontro de Mulleres Repentistas

Sito:	Centro Autonómico de Formación e Innovación - Aula virtual
Corso:	A regueifa
Libro:	Un modelo: I Encontro de Mulleres Repentistas

Stampato da:	Visitante
Data:	lunedì, 24 novembre 2025, 07:54

Descrizione

Na materia de "Regueifa e improvisación oral" un grupo de 17 alumnos e alumnas, coa coordenación do profesor, impulsaron a organización dun evento de repentismo, co obxectivo de visibilizar a nova xeración de mulleres regueifeiras da Galiza e sentirse parte do movemento sociocultural do repente galego. Así, desde fins de setembro de 2016 até o 28 de xaneiro de 2017 activouse o proceso de organización. E na semana seguinte fíxose avaliación da experiencia.

Aqui podes ollar algúns materiais do proceso de autoxestión desta actividade para teres en conta para a elaboración do teu Proxecto Final desde curso.

Sommario

1. Presentación
2. Como nos comunicamos?
3. 1. O convite para as mulleres participantes
4. Notas de prensa (ILGA-RAG+AGAL)
5. Tarefas do alumnado
6. Folla de autoavaliación do Proxecto
7. Rúbrica para avaliar a competencia "Aprender a aprender"
8. A avaliación e cualificación de RIOV
9. Conclusións da Asemblea de Mulleres Improvisadoras
10. Repercusión mediática
11. Informe da tesouraría do Encontro de Mulleres Repentistas

1. Presentación

Esta é unha actividade de lectura. Vaiche ser útil para realizar o Proxecto Final.

Aquí vas encontrar material diverso sobre un exemplo de evento de regueifa organizado polo alumnado e o profesorado de RIOV. Son materiais que representan diferentes momentos e elementos dun Proxecto como o que ti tes que entregar.

Na materia de "Regueifa e improvisación oral" un grupo de 17 alumnos e alumnas, coa coordenación do profesor, impulsaron a organización dun evento público de repentismo. O obxectivo era visibilizarmos a nova xeración de mulleres regueifeiras da Galiza e sentírmonos parte do movemento sociocultural do repente galego. Así, desde fins de setembro de 2016 até o 28 de xaneiro de 2017 activouse o proceso de organización. E na semana seguinte fíxose avaliación da experiencia.

Aqui podes ollar algúns materiais do proceso de autoxestión desta actividade para teres en conta para a elaboración do teu Proxecto Final desde curso.

Para continuar, pasa a páxina.

Neste libro hai dez páxinas con diferentes informacións.

2. Como nos comunicamos?

Para a xestión dun proceso de participación social e organización dun evento non son suficientes as horas na aula (1 hora á semana na materia de Regueifa e improvisación oral en verso)

Para dispor de máis tempo é necesario crear unha dinámica de motivación para que o alumnado se implique máis alá desa hora dentro da aula.

Para iso, é fundamental o traballo con actitudes, creación de identidade grupal e estimulación do activismo.

Alén da hora de aula o alumnado máis motivado participou en tres reunións no seu tempo de lecer no recreo.

Ademais, unha ferramenta coa que contamos desde o inicio do curso é o Galegram, rede social que permite a comunicación en grupo.

O uso desta ferramenta didáctica, -con autorización das familias- e un uso titorizado, facilita a implicación do alumnado no proceso de autoxestión.

3. 1. O convite para as mulleres participantes

Estimada amiga:

Ola, somos Nuria Penas e Noa Guzmán, alumnas da materia "Regueifa e Improvisación Oral en Verso", de 2º da ESO, no IES Marco do Camballón de Vila de Cruces. Como membros do grupo de coordinación do I Encontro de Mulheres Repentistas da Galiza, no que tamén está o noso profesor Séchu Sende, queriamos convidala ao encontro que estamos a organizar coa fin de xuntar a mulleres repentistas da Galiza e desfrutar mentres regueifamos ou nos coñecemos mellor.

No noso instituto levamos varios anos a aprender a regueifar. A Regueifa rexurdiu en Vila de Cruzes coa enerxía das rapazas e rapazes que gostamos de improvisar.

Nas nosas actividades temos como un dos obxectivos aprender valores e práticas feministas.
Queremos participar nunha renovación, actualización, modernización da regueifa con valores para a mudanza social e sentimos que no movimento de revitalización do repente galego o feminismo é imprescindíbel para conseguirmos unha Galiza, e un mundo, máis xusto.

Por iso, iniciamos un proceso de participación entre o alumnado, profesorado, nais e pais, e xente colaboradora para organizar un encontro de mulleres regueifeiras en Vila de Cruces.

O dia que vamos celebrar o Encontro de Mulheres Repentistas é o 28 de xaneiro. Ese sábado temos pensado facer:

Unha asemblea de mulleres, para falarmos da situación actual.
Un obradoiro de regueifa feminista, impartido por Alba María, para aprendermos algunhas cousas.
Un espectáculo de Regueifa, para cantar.

E algunha cousa mais...

De entrada, pensamos que dous bos motivos para este encontro son xuntarnos para regueifar e xuntarnos para aprender entre nós, falar, debater sobre o repente galego, as mulleres, o feminismo e outras cousas. Por outro lado, é un bo momento para visualizar que a primeira xeración contemporánea de mulleres improvisadoras xa está aquí.

Gostariamos de contar coa túa participación.
Que che parece esta idea?

Atentamente:
Nuría Penas, Noa Guzmán e Séchu Sende

Se queres contactar con nós: regueifesta@gmail.com

4. Notas de prensa (ILGA-RAG+AGAL)

Por cuestións de eficacia comunicativa e atendendo ás distintas sensibilidades lingüísticas que conforman o movemento sociocultural do repente galego e o impulsan con enerxía social, rediximos a nota de prensa en galego norma ILGA-RAG (Ñ) e en norma galego AGAL (NH).

Encontro de Mulleres Repentistas da Galiza

O vindeiro sábado28 de xaneiro terá lugar o “I Encontro de Mulleres Repentistas da Galiza” en Vila de Cruces, organizado polo alumnado da materia “Regueifa e improvisación oran el verso” do IES Marco do Camballón, e impulsado polo Proxecto Regueifesta, un proxecto educativo para impulsar o repentismo no mundo do ensino, e que forma parte da Asociación ORAL, que promove o repente galego.

O VINDEIRO XOVES, ás 11.30, TERÁ LUGAR UNHA RODA DE PRENSA A CARGO DO ALUMNADO DO IES MARCO DO CAMBALLÓN QUE ORGANIZA ESTE EVENTO.

A improvisación cantada en verso ou repente, popularmente coñecida como “regueifa”, centra este Encontro e reunirá arredor de quince rapazas e mulleres repentistas de toda Galiza que participarán nas diferentes actividades desta xornada para a reflexión, a formación e a festa.

O repente galego encóntrase nun momento de crecemento e estase a conformar como un movimento sociocultural que ten na aparición dunha nova xeración de mulleres regueifeiras un dos seus motores máis destacados, abrindo novos camiños nun ámbito até hai moi pouco protagonizado case exclusivamente por homes.

As actividades do Encontro de Mulleres Repentistas teñen como obxectivo destacar a vitalidade actual da regueifa como actividade artística e comunicativa, e visibilizar a chegada dunha nova xeración de mulleres improvisadoras.

Como resultado dun traballo de autoxestión e organización do alumnado do IES Marco do Camballón, o Encontro de Mulleres Repetistas ofrece unha xornada de sábado con diversas actividades gratuítas no auditorio Xosé Casal: ás 11.30 da mañá terá lugar unha asemblea de mulleres repentistas onde se analizará o momento actual da regueifa de muller. Pola tarde, ás 16.30 Alba María impartirá um Obradoiro de Regueifa Feminista. E ás 18.00 terá lugar un espectáculo de improvisación en verso -aberto ao público e gratuíto- que reunirá no escenário a máis de dez mulleres de diferentes xeracións do repente galego. No acto tamén se celebrará unha homenaxe a Angelita de Baño, brindeira do Courel, e á cantareira e pandereteira Xosefa de Bastavales.

Neste Encontro procurarase visualizar a importancia das mulleres no desenvolvemento da regueifa tamén desde un achegamento histórico, lembrando as grandes do século XX, como Leonarda de Tallo. A finais do século XX Marisol Manfurada uniu regueifa e RAP desde o movimento do Rock Bravú e nesa altura Sofia Tarela e Paola Beiro, as Garotas, tamén destacaron pola súa arte como regueifeiras. A luguesa Pepa Yáñez, que regueifou e investigou o mundo do repente galego, foi outra das protagonistas deste movemento que ten como regueifeiras máis novas a Noa do Capón e a Nuria das Cruces, de 13 anos, alumnas de “Regueifa e improvisación oral en verso” no IES Marco do Camballón

No acto proxectarase un vídeo en homenaxe a Angelita de Baño, unha artista que cantou brindos -a improvisación cantada no Courel- desde os catorce anos, e á que foi entrevistar o Proxecto Regueifesta á montaña luguesa. Tamén se lle fará unha homenaxe a unha das artistas máis queridas no mundo da música tradicional dos últimos anos: a señora Xosefa de Bastavales.

Ás 21.00 terá lugar unha Foliada Regueifeira no Bar Txapela, onde participarán, xunto ás mulleres repentistas, e mais quen queira cantar e bailar, as pandereteiras de Cercio.

...

Encontro de Mulheres Repentistas da Galiza

O vindeiro sábado28 de janeiro terá lugar o “I Encontro de Mulheres Repentistas da Galiza” em Vila de Cruzes, organizado polo alunado da cadeira “Regueifa e improvisaçom oral em verso” do IES Marco do Cambalhom, e impulsado polo Projeto Regueifesta, un projeto educativo para impulsar o repentismo no mundo do ensino, e que forma parte da Asociación ORAL, que promove o repente galego.

A improvisaçom cantada em verso ou repente, popularmente conhecida como “regueifa”, centra este Encontro e reunirá arredor de quinze rapazas e mulheres repentistas de toda Galiza que participarám nas diferentes actividades dest jornada para a reflexom, a formaçom e a festa.

O repente galego encontra-se num momento de crescimento e esta-se a conformar como um movimento sociocultural que tem na apariçom dumha nova geraçom de mulheres regueifeiras um dos seus motores mais destacados, abrindo novos caminhos num ámbito até fai mui pouco tempo protagonizado quase exclusivamente por homes.

As actividades do Encontro de Mulheres Repentistas tenhem como objectivo destacar a vitalidade actual da regueifa como actividade artística e comunicativa, e visibilizar a chegada dumha nova geraçom de mulheres improvisadoras.

Como resultado dum trabalho de autogestiom e organizaçom do alunado do IES Marco do Cambalhom, o Encontro de Mulheres Repetistas oferece umha jornada de sábado com diversas actividades gratuítas no auditório Xosé Casal: às 11.30 da manhá terá lugar umha assembleia de mulheres repentistas onde se analizará o momento actual da regueifa de mulher. Pola tarde, ás 16.30 Alba María impartirá um Obradoiro de Regueifa Feminista. E às 18.00 terá lugar um espectáculo de improvisaçom em verso -aberto ao público e gratuíto- que reunirá no escenário máis de dez mulheres de diferentes geraçons do repente galego. No acto tamém se celebrará umha homenagem a Angelita de Baño, brindeira do Courel, e à cantareira e pandereteira Josefa de Bastavales.

Neste Encontro procurarase visualizar a importáncia das mulheres no desenvolvimento da regueifa tamém desde um achegamento histórico, lembrando as grandes do século XX, como Leonarda de Tallo. A finais do século XX Marisol Manfurada uniu regueifa e RAP desde o movimento do Rock Bravú e pouco despois Sofia Tarela e Paola Beiro, as Garotas, tamém destacarom pola sua arte como regueifeiras. A luguesa Pepa Yáñez, que regueifou e investigou o mundo do repente galego, foi outra das protagonistas deste movimento que tem como regueifeiras mais novas a Noa do Capón e a Nuria das Cruces, de 13 anos, alunas de “Regueifa e improvisaçom oral em verso” no IES Marco do Cambalhom.

No acto projetara-se um vídeo em homenagem a Angelita de Baño, umha artista que cantou brindos -a improvisaçom cantada no Courel- desde os catorce anos, e à que foi entrevistar o Projeto Regueifesta à montanha luguesa. Tamém se lhe fará umha homenagem a umha das artistas mais queridas no mundo da música tradicional dos últimos anos: a senhora Josefa de Bastavales.

Às 21.00 terá lugar umha Foliada Regueifeira no Bar Txapela, onde participarám, junto ás mulheres repentistas, e mais quem queira cantar e bailar, as pandereteiras de Cércio.

Teléfono de contacto:

IES Marco do Cambalhom: 886 15 17 31

5. Tarefas do alumnado

Produción dun evento de Regueifa

Encontro de Mulleres Regueifeiras

Coordenación: Nuria Penas e Noa de Capón

Prensa: Americana, Brais de Cores, Nuria Penas.

Publicidade: Byronzinho

Deseño: Noa, Pauli.

Redes sociais: Iñaki, DJChristian, Nico Verde

Presentación do Encontro / guión: Carla de Brandomés, Marco Pedreira

Son, fotografía e vídeo: David-Dabar150, Pauli

6. Folla de autoavaliación do Proxecto

Avaliación do traballo individual no proxecto colectivo

Nome:

Grupo:

Proxecto:

As miñas funcións dentro do proxecto (no cadro):

Individuais:

(Por exemplo: - Facer o logo do proxecto.)

En grupo:

(Por exemplo: - Compartir o logo no grupo para recoller opinións)

Avaliación final

Destrezas	1	2	3	4	Reflexión (Debemos mellorar... porque...)
Respondín correctamente ás responsabilidades do traballo asignado
Planifiquei previamente a realización do traballo asignado e cumprín coas actividades e tarefas.
Organiceime no desenvolvemento tanto do traballo individual como grupal.
Respectei a valorei as achegas das miñas compañeiras e compañeiros, motivándoos e axudándolles en todo o posíbel, e realizando críticas construtivas.
Participei na toma de decisións en grupo, achegando solucións creativas e empregando material complementario
Independentemente do resultado, esforceime e dei o mellor de min
Contribuín ao bo ambiente do grupo, coñecendo a importancia que isto ten para poder realizar ben o traballo.
Cumprín cos obxectivos do equipo, acordados previamente
Traballei tendo en conta os valores promovidos polo movemento sociocultural da regueifa: humor, defensa da xustiza social, irmandade, non sexista, non competitividade...

7. Rúbrica para avaliar a competencia "Aprender a aprender"

Esta é parte da rúbrica para avaliar a competencia "Aprender a aprender". É a parte que nos interesa para reflexionar sobre avaliación e autoavaliación do proceso de organización, participación e autoxestión do evento de repente, neste caso, o I Encontro de Mulleres Repentistas

Competencia para aprender a aprender (CC) 2º da ESO

Proceso

Estándares prioritarios

Rúbrica do nivel de logro

Excelente

(2,5-3 puntos)

Satisfactorio

(2-1,5 puntos)

Básico

(1,5-0.75 puntos)

Escaso

(0.75-0 puntos)

Valoración da xestión do traballo individual e colectivo para desenvolver proxectos.

Participación no proceso de aprendizaxe organizando procesos cooperativos, de forma persoal e/ou en grupo, con creatividade.

(2,5 puntos)

2º RIOV. B5.1.1. Participa activamente na planificación e xestión dun encontro de regueifa.

2º RIOV. B2.5.1. Elabora organiza e difunde o material elaborado sobre regueifa através das TIC.

2º RIOV. B2.1.2. Valora o patrimonio inmaterial como elemento de desenvolvemento sociocultural.

2º RIOV. B5.2.1. Comprende que forma parte do proceso de transmisión da regueifa.

Participa sempre de forma activa, planificando e xestionando, individualmente e en grupo ,o proceso de organización dun encontro público de improvisación oral en verso.

Elabora e difunde material sobre regueifa através das TIC, sempre que é necesario, con autonomía e excelente calidade comunicativa.

Ten en grande valor o patrimonio inmaterial así como a súa función persoal na transmisión sociocultural da improvisación oral en verso.

Sempre gosta de coñecer e incorporar os valores éticos do movemento social da improvisación en verso: colaboración mutua, resolución de conflitos de forma non violenta, defensa da xustiza social, humor, non competitividade, movemento colectivo cooperativo...

Na organización dun encontro de regueifa, participa de forma satisfactoria, tanto a nivel individual como no traballo en grupo.

Elabora e participa adecuadamente na difusión, através das TIC; dos materiais sobre regueifa e improvisación oral en verso.

Valora de forma satisfactoria o patrimonio inmaterial así como a súa función como axente de transmisión da regueifa.

Asume, de forma satisfactoria, os valores éticos da improvisación oral en verso que caracterizan o movemento na Galiza, especialmente o humor, a non competitividade, ou a defensa da xustiza social contra as discriminacións.

Participa, cunha intensidade básica, na organización dun encontro público de regueifa

Elabora e difunde os materiais da regueifa, através das TIC, de vez en cando.

Con carácter xeral, non valora, á que nos aspectos máis básicos, o patrimonio inmaterial, e a súa función como axente transmisor da regueifa.

Asume algúns dos principios éticos do movemento da regueifa, de vez en cando: humor, non competititividade, xustiza social, etc.

Non participa activamente na organización dun encontro de regueifa.

Non elabora nunca ou case nunca material sobre regueifa através das TIC, nin os difunde.

Non valora nunca ou case nunca a importancia do patrimonio inmaterial nin comprende a importancia da súa función na transmisión e socialización da improvisación oral en verso.

Non participa dos valores do movemento educativo e social da regueifa: humor, xustiza social, non cmpetititividade, etc.

8. A avaliación e cualificación de RIOV

Aqui podes ollar, se tes curiosidade, os procedementos de avaliación e cualificación. Como verás, o traballo de participación na organización do evento de regueifa ten un valor de 2 puntos dos 10 do total.

AVALIACIÓN de REGUEIFA E IMPROVISACIÓN ORAL EN VERSO:

Que se avalía?

(Estándares de aprendizaxe)

Como se avalía?

(Procedementos e instrumentos)

Comunicación musical

Estándares RIOVB1.1.1, RIOVB1.1.2, RIOVB1.2.1, RIOVB1.2.2, RIOVB1.3.1, RIOVB1.3.2, RIOVB1.3.3, RIOVB1.3.4 RIOVB1.3.5, RIOVB1.4.1. RIOVB1.4.2. RIOVB1.5.1, RIOVB1.5.2

Observación diaria e rexistro

Prácticas orais planificadas

Rúbrica de proba de improvisación cantada en verso

Historia e actualidade do repentismo

Estándares RIOVB2.1, RIOVB2.3, RIOVB2.3, RIOVB2.4, RIOVB2.5, RIOVB2.6

Revisión do caderno

Traballos escritos (individuais ou en grupo)

Proba escrita

Comunicación lingüística, poética e retórica

Estándares RIOVB3.1.1, RIOVB31.2, RIOVB3.2.1, RIOVB3.2.2, RIOVB.3.2.3, RIOVB3.3.1, RIOVB3.4.1,

Observación diaria e rexistro

Traballos orais (individuais e en grupo)

Proba de improvisación cantada en verso

Comunicación escénica e performance

Estándares RIOvB4.1.1, RIOVB4.1.2

Observación diaria e rexistro

Traballos de práctica escénica (individuais ou en grupo)

Proba de improvisación cantada en verso

Creatividade e xestión sociocultural

Estándares RIOVB5.1.1., RIOVB5.2.1, RIOVB5.3.1

Observación diaria e rexistro

Traballos escritos (individuais ou en grupo)

CAA

Rúbrica

Criterios de cualificación:

Con carácter xeral, temos que ter en consideración que esta é unha materia que ten como obxectivo central o desenvolvemento da expresión oral improvisada en verso, así como o coñecemento da historia do repente e o desenvolvemento de procesos de xestión cultural e o traballo con valores. A materia desenvolve pois, fundamentalmente, a oralidade do alumnado.

Ao longo das avaliacións o alumnado desenvolverá actividades arredor da expresión oral e corporal, cunha especial atención á dimensión práctica, en diferentes dimensións: musical, lingüística, poética, comunicativa, performática, de xestión cultural...

Por iso no proceso de avaliación os instrumentos de cualificación terán en conta recursos innovadores como sistemas de gravación, reprodución e arquivo de voz e/ou audiovisual.

Sistema de cualificación:

1.-Probas práticas de avaliación dos estándares de aprendizaxe de Comunicación musical: 10 %

Avaliaranse através de observación diaria e unha proba de improvisación oral en verso ao final de cada avaliación (ver rúbrica)

2.-Unha proba-exame que avalía os estándares de aprendizaxe principais dos diferentes Bloques: 10%

Esta proba pode ser oral ou escrita e terá como obxectivo que o alumnado demostre o resultado da súa aprendizaxe.

Na proba os contidos terán o seguinte peso

Contidos
Comunicación musical	10%
Historia e actualidade do improviso	50%
Comunicación lingüística, poética e retórica	10%
Comunicación escénica e performance	10
Creatividade e xestión sociocultural	10%

3. -Unha proba práctica de improvisación oral en verso (ver rúbrica): 20%

4.- Avaliación da Competencia Aprender a aprender (ver rúbrica) : 20 %

Esta competencia é transversal en todas as dimensións da materia e, alén diso, valorámola de forma explícita através dun traballo en grupo de creatividade e xestión sociocultural consistente na organización dun evento, actividade ou intervención educativa e sociocultural.

5.- Prácticas na aula e traballo na casa: 20%

As prácticas na aula (10%) avaliaranse mediante observación e rexistro do profesorado e rúbricas. En cada práctica oral o profesorado explicará os criterios concretos de puntuación. Realizarase, como mínimo, unha práctica oral planificada (individual ou en grupo) por avaliación.

Realizarase traballos na casa, (10%), fundamentalmente prácticos, que o alumnado exporá nas aulas. Avaliaranse mediante un rexistro do profesorado.

6. -Traballo escrito de investigación individual: 20 %

Recollerase un traballo individual escrito, sonoro ou audiovisual, por avaliación relacionado con tarefas de comprensión e análise dos bloques de contido da materia.

Tamén estableceremos actividades para a autoavaliación do proceso de aprendizaxe por competencias por parte do propio alumnado.

Observacións xerais e recuperacións:

A nota de cada avaliación calcularase sumando as notas de cada un dos instrumentos anteriores debidamente ponderados; para obter unha cualificación positiva será necesario obter unha nota de 5 ou superior.

A cualificación da avaliación final obterase mediante o cálculo da media aritmética das tres avaliacións, sempre que estean todas aprobadas.

Recuperacións

Cando un alumno/a teña unha avaliación suspensa pode aprobar directamente na final sempre que a media das tres avaliacións supere os 5 puntos; se a media non chega para aprobar directamente ou cando teña suspensas dúas avaliacións deberá realizar unha ou dúas probas de recuperación, respectivamente, sobre os contidos da/s avaliación/s pendente/s. Sería necesario obter 5 puntos para considerala recuperada. Pola contra, o alumnado que non superase ningunha das tres avaliacións ao longo do curso non terá opción de recuperación en xuño e deberá presentarse á proba da convocatoria extraordinaria de setembro.

Na convocatoria de setembro efectuarase unha proba oral de improvisación oral, individual ou en grupo, e un exame escrito con contidos dos bloques da materia. Será necesario acadar 5 puntos para aprobar.

Contidos
Comunicación musical	15,00%
Historia e actualidade do improviso	40,00%
Comunicación lingüística, poética e retórica	15,00%
Comunicación escénica e performance	15,00%
Creatividade e xestión sociocultural	15,00%

RÚBRICAS de Regueifa e improvisación oral en verso (RIOV)

Rúbrica para avaliar unha proba de improvisación oral en verso

Criterios de avaliación:

1. Vocaliza, usa o volume e o ton de forma axeitada

2. Fai un uso adecuado da comunicación musical

3. Adapta o ton do discurso (serio, humorístico, etc) ao tema e ás circunstancias

4. Coida a linguaxe non verbal e actúa con seguridade escénica

5. É orixinal e innova. Sorprende.

6. Ten riqueza léxica.

7. A información, os temas desenvolvidos, son adecuados, coherentes e lóxicos

8. Emprega a lingua de forma correcta, coidando o seu discurso de castelanismos

9. Utiliza a linguaxe non sexista e promove valores non discriminatorios.

10. Interactúa co auditorio e/ou compañeiras e compañeiros de improviso.

Puntuación:	4 3	3 2	2 1	1 0
Volume, vocalización	Oíuselle perfectamente, con claridade e unha boa vocalización.	Nalgún caso non se oe ben	Hai dificultades para entender o que canta	Non se oe nada do seu improviso
Comunicación musical	A sua interpretación musical é excelente.	A realización musical é satisfactoria	Presenta eivas e defectos na interpretación musical.	A súa interpretación musical é pobre e distorsionada.
Ton do discurso (humor, seriedade...)	O seu ton é moi expresivo e ten capacidade para mudar de ton expresivo e crear dinamismo durante os diferentes momentos da improvisación.	Por veces o ton non é dinámico ou adecuado.	O ton do improviso non é apropiado. Por veces é monótono.	Non ten variacións de ton. Monotonía na interpretación.
Linguaxe non verbal e seguridade escénica	Desenvólvese con naturalidade diante do público. O corpo móvese con expresividade, de forma consciente e efectiva.	Ás veces, mostra inseguridade.	A súa linguaxe corporal é básica. Mostra nerviosismo.	A súa linguaxe non verbal non é eficaz.
Orixinalidade	Improvisa con creatividade e orixinalidade, sorprendendo ao público.	Ás veces soprende con algún elemento orixinal	Moi poucas veces é orixinal na creación do discurso	Exprésase repetindo tópicos e lugares comúns
Riqueza léxica	Improvisa con riqueza de vocabulario, adecuado aos temas, e variado, especialmente nas palabras rima.	Inclúe, ás veces, vocabulario rico e variado.	O seu material de creación léxica non é moi variado. Vocabulario básico.	Pobreza de vocabulario no discurso.
Información coherente e lóxica	A información e temas sobre os que improvisa son moi adecuados ao contexto, e exprésaos con coherencia e cohesión.	Ás veces o seu discurso adecúase á situación comunicativa, mais ten erros para construír discurso coherente e adecuado.	Normalmente improvisa sen coherencia nin adecuación	O seu discurso non é coherente, adecuado nin cohesionado.
Corrección lingüística	Exprésase con corrección e calidade de lingua.	No seu discurso aparecen incorrecións que crean ruído e empobrecen o improviso.	Improvisa con castelanismos e outros desvíos da norma.	Improvisa continuamente con castelanismos, vulgarismos e outros desvíos da norma (hiperenxebrismo)
Valores non discriminatorios	Improvisa con linguaxe non sexista e desenvolve expresións e ideas con valores contra as discriminacións sociais.	Emprega, de vez en cando, a linguaxe non sexista. Ás veces inclúe a defensa de valores non discriminatorios.	Utiliza a linguaxe non sexista de forma pouco habitual, así como expresións en defensa da xustiza social e contra os prexuízos sociais.	A súa linguaxe é sexista e discrimatoria: racismo, homofobia, clasismo, etc.
Interacción co público e compañeiras/os	Interactúa activamente co público e compañeiras de improviso de forma natural e expresiva, aproveitando o feedback para enriquecer a comunicación.	Às veces establece interacción directa co público e compañeiras de regueifa.	Improvisa tendo pouco contacto, básico, co público e compañeiras/os de regueifa.	Nunca interactúa directamente co público. Fica isolado/a no escenario sen aproveitar o feedback.

Rúbrica para avaliar a competencia Aprender a aprender